Archief voor categorie: Geen categorie

Dit versjrikkelijk nuuts is aafgeloupe weekend bie de Societé Oud Prinsen (’t SOP) en Vastelaoves Vereiniging de Steinder Bök bènne gekôme. Oud-Prins Jos waor in 1994 prins van de Steinder Bök.

Jos waor in Stein bekènd van zien danssjwoal aan de Haven in Stein. És oud-prins waor hea eine van de initiatiefnummers veur eine doorstart van de vereiniging nao ein aantal moeilijke jaore. ’t Bokkeweekend heat zien oorsprong in zien danssjwoal, wo ver és Steinder Bök dankbaar gebruuk höbbe gemaak van zien locatie. Jaorelang höbbe ver meinige prins dao maoge oetrope en sjieke recepties kènne belaeve.

Jos waor eine sjieke prins, mit zien Kölsch pak en trôk euveral de aandach mit zien rwoaj sjoon, veurzeen van witte strikke en zien vaste begeleiders; de leden van de danssjwoal die és “De Sjwiksjrömers” door de Steinder Vastelaovend trokke.

Oos gedachte gaon oet nao zien familie en vrunj.

Jos, eine lètste Alaaf veur dich!

Societé Oud Prinsen ’t Sop

VAstelaoves Vereiniging de Steinder Bök

Euver oze Optochroute is dit jaor väöl te doon. ’t Is echter neet zwoa eenvoudig aanpassingen te doon, vanwege allerlei versjillende aafwaeginge die weer és Steinder Bök wille en môte maake. Simpel en Ad Hoc aanpassingen in de route maken is d’r neet bie. Weer höbbe in good euverlègk mit de Gemeinte Stein al jaore ein route opgestèld wobie de volgende punten van belang zeen;

• veiligheid van kiekers en deilnummers
• optimale doorstruiming van verkjaer
• zoväöl mäögelik straote opnumme ôm alle meujte en tied wat deilnummers in d’n optoch staeke aan de luuj te kènne laote zeen

De horeca speelt hiebie auch ein belangrieke rol ôm versjillende reije; zie make de optochte mit hunne steun mäögelik en op die plaatse staon väöl kiekers.

Dit jaor höbbe ver echter geconstateerd dat de Gemeinte Stein verkeersremmende maotraegele heat genôme bie de kruusing Vaart – Heerstraot. Daodoor is ’t neet meer mäögelik ôm vanoet de Vaart de Heerstraot in te drejje. In good euverlègk is aafgespraoke d’n Optoch bie de Vaart te laote euverstaeke nao de Langhaagwaeg, en vervolgens via de Breinderwaeg weer de Smeetsstraot in te drejje. Zwoa hauwe ver d’n optoch veilig.

Alvas dank veur uch begrip. Vastelaovend same!

Eine Grwoate Vastelaovesvierder is neet meer…

Vandaag bereikde oos ’t dreuvige berich van ’t euverlieje van Huub Ramakers, collega-vorst, Oud-Veurzitter en Grwoatvors van CV Nieuwdorp. Huub waor jaorelang ’t boegbeeld van de Nuujdorpse Vastelaovend. Mit gepaste trots neumde hea de Steinder Bök en CV Nuujdorp “zöstervereiniginge”. En dat waor auch zwoa. Ès gooi gezösters höbbe weer oos mit reagelmaot in de Vastelaovend ’t vel aafgedaon, maer kôste aansloetend mit eine gooje pot beer weer wiejer. En zo heurt ’t auch. Huub gaof altied en euveral acte de présence, waor eine echte veurzitter en kos mit zien grwoate hénj fatsoenlijk op taofel houwe.

Perseunlik herinner ich mich Huub es emes dea stông veur “zien” vereiniging en de Nuujdorpse Vastelaovend. Weer zochte oos bie de recepties altied eavekes op veur eine korte babbel of geweun te vraoge wie ’t ging. Huub, sjiek watse veur dien vereiniging allemaol höbs gedaon.

Eine lètste Alaaf namens de Steinder Bök,

Alaaf!

Gisteren bereikde oos ‘t berich dat Oud Prins Pierre I Schiffers is euverleeje. Dit berich is auch bie Vastelaoves Vereiniging de Steinder Bök mit dreufenis ontvange. Oud Prins Pierre I waor prins in 1980, same mit jeugdprins Raymond I van der Honing. Pierre waor slechter van beroop en kaom mit zien oetreuping oet eine grwoate salami. Zien dochters Joyce en Steffie zouwe later dansmarietjes weare bie de Steinder Bök. Ziene kleinzoon Jules I waor in 2012 jeugdprins.

Oud prins Pierre I volgde oud prins Thei I Hanckman op es prins van de Steinder Bök. In ein bômvolle fjéstent woort hea op de galazitting oetgerope.

Oos gedachte gaon oet nao zien kénjer en kleinkénjer, familie en vrujn.

Pierre, eine lètste alaaf!

Vastelaoves Vereinging de Steinder Bök

Dit treurige berich is vandaag (12-9-2020) bie de Societé Oud Prinsen (’t SOP) en Vastelaoves Vereiniging de Steinder Bök ontvange. Oud Prins Kees I waor prins van de Steinder Bök in 1968.

Oud-prins Kees I stông in Stein beater bekènd és Keesje van ’t Heukske. Mit zien vrouw Annie waore zie lange tied ’t gezich van Café ’t Heukske aan de Kruusstraot in Stein. Meinig Vastelaovesfeestje is dao geweas. Väöl luuj van Stein zeen dao op stap geweas wie de Dancing ech dancing waor, compleet mit DJ of orkés.

Kees waor de letste prins dea woort oetgerope in de Fanfarezaal. Hea waor dan auch de eerste prins dea aaftraoj in de eerste Tent van Stein. Kees bleef tot op heden lid van ’t SOP en zwoalang zien gezôndheid ’t toeleet waore hea en Annie euveral bie. Dit jaor waor ziene achterkleinzoon Mika I Jeugdprins bie de Steinder Bök. Ein gebäörtenis die hea gelökkig heat maoge mitbeleave.

Oos gedachte gaon oet nao kénjer, kleinkènjer, achterkleinkènjer, femilie en vrujn.

Kees, Alaaf!

Societé Oud Prinsen ’t Sop

Vastelaoves Vereinging de Steinder Bök.