’t PleinfeStein is dit jaor in ein grwoater jeske gestaoke. Café de Bekker, Café de Poart en Ricky’s Pub höbbe de hejn inein geslage mit de Steinder Bök en höbbe ein waanzinnig fjés neergezat op ’t Wilhelminaplein. Dit jaor zeen dao auch veur ’t eerst in de historie van de vereiniging de prinsen oetgerope. Wilt ger ff trökkieke? Kiek dan gauw op Bokke-TV.
Eine Grwoate Vastelaovesvierder is neet meer…
Vandaag bereikde oos ’t dreuvige berich van ’t euverlieje van Huub Ramakers, collega-vorst, Oud-Veurzitter en Grwoatvors van CV Nieuwdorp. Huub waor jaorelang ’t boegbeeld van de Nuujdorpse Vastelaovend. Mit gepaste trots neumde hea de Steinder Bök en CV Nuujdorp “zöstervereiniginge”. En dat waor auch zwoa. Ès gooi gezösters höbbe weer oos mit reagelmaot in de Vastelaovend ’t vel aafgedaon, maer kôste aansloetend mit eine gooje pot beer weer wiejer. En zo heurt ’t auch. Huub gaof altied en euveral acte de présence, waor eine echte veurzitter en kos mit zien grwoate hénj fatsoenlijk op taofel houwe.
Perseunlik herinner ich mich Huub es emes dea stông veur “zien” vereiniging en de Nuujdorpse Vastelaovend. Weer zochte oos bie de recepties altied eavekes op veur eine korte babbel of geweun te vraoge wie ’t ging. Huub, sjiek watse veur dien vereiniging allemaol höbs gedaon.
Eine lètste Alaaf namens de Steinder Bök,
Alaaf!